TRI CUTEDDRA MAMMA VO’

Si sta parlannu assà di la pazzìa
Ca priva genti e vacchi di la vita.
Sta cosa fa viniri ‘n menti a mìa
Quannu lu vo’ facìa l’urtima gita.

Tanti carusi cci ivanu apprìassu
A la manera di na prucissioni,
P’assistiri a ddra speci di prucìassu
Ca a lu vo’ nun dava assoluzioni.

La spranza era pi lu carusìaddru
Di na bussica arricupirari
E farl’addivintari un pallunìaddru
Ca cu l’amici ci putìa iucari.

A lu vo’ cunnannatu si cantava
- senza aviri pietà né compassioni
pi la sorti c’a l’armar’aspittava-
Na filastrocca ca facìa ‘mprissioni:

VO’ VO’ VO’
TRI CUTEDDRA MAMMA VO’
E LU SANGU VIA VIA
E LA CARNI A LA VUCCIRIA

Doppu ca l’armaru addivintava
Sustanza ca ni dava la saluti,
na lapa a li vuccera cunsignava
ddri cuasti ca finivan’arrustuti.

Ma cu si li putivan’accattari?
Li ricchi! L’antri sulu ni li festi!
Ora tutti lu putissimu fari
Ma ni scantammu pi sta nova pesti.

Lu munnu, oji, è cchiù mudernu, certu!
Chissu però nun è prugressu veru,
Si doppu ca si mancia lu lacertu
Si po’ finiri a lu cimiteru!

(scritta in occasione dell’epidemia della "mucca pazza".
Ricordo che, quando ero bambino si conduceva l’animale al macello e i bambini, un po’ per sadismo, un po’ sperando di ricevere la vescica dell’animale che, opportunamente pulita e lavata, diventava un palloncino con cui giocare seguivano la bestia condannata)