Di Naru ma nannu avìa purtatu
Na bella statua di jssu pittatu
A ma patri ca porta lu nomu
Di chiddru santu ca fu un grann’omu.

E ma zzi Tanu ch’avìa un grann’incegnu
C’avìja fattu na vara di lignu,
e lu juarnu a Caloriu vutatu
lu santu cci vinìa assistimatu.

Si uncivanu nni chiddr’acchianati
Midemma carusi ora abbucati
E cu lanterni e grida tunanti
Si partianu pi la via di li santi.

Anchi s’un’era di li cchiù famusi
Era San Caloriu di li carusi:
apprìassu ad iddru picca parrina
ma un gran rumuri di tammurina.

A quarcunu na gran vuci nisciva:
"Ebbiva San Calojaru ebbiva!"
Quarchi fisci partiva ogni tantu
E sinni iva n’cialu gantu gantu.

Cu ddri belli tammura culurati
Li carusi parivanu surdati
Divoti di lu santu africanu
Ca na notti mitì un fiaudu sanu.

Chissa sì era festa piddiveru
Anchi siddru la chiesa nun c’intrava!
Ora antri santi hannu cchiù valuri
Ma Caloriu di tutti è lu signuri.