LATTI FRISCU

P’aviri latti e nun jiri luntanu
S’aspittava la matina Giacanu
Ca lu munciva di li minniceddri
Di una di li so crapuzzi beddri

E ogni vota era na battaglia
Prima ca sinn’inchissi na buttiglia,
Ca picca era lu latti e assà scumazza
La cosa ca finiva ni la tazza.

P’ogni famiglia c’era na crapuzza.
Guai si ti canciava l’armaruzza,
C’anchi lu latti sapuri canciava
E a li carusi nun ci cuddrava.

A mìa lu latti nun m’ha mai piaciutu
E sempri picca mi n’haju vivutu
Forsi picchì ni lu ma taganiaddru
Sempri cadiva quarchi cicirìaddru.

"A nenti ci fa! chi ssi stufficusu!
Pua lu vuddrìammu quannu sìammu susu!"
Ma a mìa la cosa nun mi cumminciva
E sempri lu scuncertu mi viniva.

A li voti na campana annunziava
Ca lu latti na vacca ti purtava
C’un vutiddruzzu c’apprìassu ci iva
E lu patruni lestu la munciva.

‘Ngannu era pi la vacca l’armaruzzu
Certa c’ad iddru dassi lu lattuzzu,
e taliannuti cu l’uacchi vagnati
t’arrigalava ddri gucci arrubbati.

Ora lu latti è cunfiziunatu
L’accattu a la putìa stirilizzatu,
Ma ogni vota a mìa mi vìannu ‘n menti

L’armari di Giacanu e Vicilenti,
Ca cujeti si facivanu fari
Pi nichi e ranni putiri sfamari.