Di lu callu si mori ni sti jorna,
Veni voglia di jirisinni a mari,
E allura ‘menti a mia mi torna
Di quantu un bagnu ni facìa pinari.
Ora la spiaggia divintà vicina
E cu la machina a lampu s’arriva
Ma prima era comu jiri ‘n Cina
E p’arrivari tiampu ci vuliva.
La juta a mari nun era vacanza:
Si jiva e viniva ni la jurnata,
Er’occasioni p’inchisi la panza
E pi pigliari na bell’abbrusciata.
Cincu, sei carusi si uncìanu
E doppu c’accucchiavanu li grana
Machin’a noleggiu s’affittavanu
E via! Pi San Leoni o Siculiana.
Era ridicula ddra cumpagnìa:
Bianchi comu tumazzu primu sali,
D’unni vinivanu lestu si capìa
Picchì nuddru ci la sapìa a natari.
Cammaradarii pi salvagenti
Chini di pezzi di riparazioni;
Ma tutti eranu tantu cuntenti
Di ddri mumenti di ricreazioni.
Oltri tri metri lu cchiù curaggiusu
Ci jiva sulu siddru si tuccava,
Mentri s’ammintava quarchi carusu
Trucchi p’addimustrari ca natava.
Versu mazzìuarnu na bella manciata:
Ah! socchi nisciva di lu sacchettu!
Frosci, purpetta e pasta ‘mpurnata,
Muluna russi: u’ meru banchettu!
Doppu pi forza s’appinnicavanu.
Armenu tri ur’avian’aspittari:
Tannu li spaddri s’arrussicavanu
Di nun putirili arriminari.
E chi fastidiu la rina allura.
"Nun mi tuccati cumpà, ca m’arzìa!"
"Quannu ni jammu? mi pari già l’ura!"
"Carù, sta scurannu, pigliammu la vìa!".
Era già scuru quannu s’arrivava.
Ma doppu na lavata e na manciata
Si jiva a la chiazza e si passiava:
"Miiii! chi si russu, chi facci arrussata!"
E ognunu a l’antri addumannava
Ni quali spiaggi avivanu statu.
Ma doppu tri uri ca si passiava
Un lìattu friscu er’addisiddratu.
Ma pi ddru callu di la jurnata
La frevi a quaranta già t’acchianava:
Si priparava na mala nuttata
E la pumata to mà ti stricava.
Chiss’era distinu di tutti l’anni:
Doppu la festa vinìanu l’affanni.
Ddra bella vacanza durata un juarnu
Pi na simana ti livava lu suannu!