Cuazzu tunnu

Ni la parti ganta di Muntidoru,
Unni c’è ora na villa jhuruta
Cu tanti statui ca parinu d’oru
- Na para curcati, una funciuta -

C’era na vota un turrenu asciuttu
Cu pruvulazzu e quarchi fissuni
Ca a quarchi foddri cci pariv’adattu
Pi jiricci a jucari a lu palluni.

Lu risurtatu era sempri chiddru:
Canzi strazzati, palluni scassatu,
O comu ‘ntupp’a ma frati Taniddru
Ca si nnì scinnì c’un grazzu stuccatu.

Si si sbagliava a tirari la palla
Chista finiva a "Maria la Cani"
E s’avia a scinniri a jiri a pigliarla
Arricampannusi chini d’affanni.

Ogni tantu la nostra "nazionali"
Spidava chiddra di l’antri paìsa,
E la sciarra era cosa nurmali
Si jucava la squatra safarchisa.

Cu certi tifusi ca a "Cuazzu Tunnu"
C’acchianavanu pi fari burdellu
Succidiva un veru finimunnu
Cu vuci c’arrivavanu a "Marcellu".

Pugna, bastemii, paroli d’uffisa
E li jucatura tutti sudati
‘Mpignati a ‘rrivari ‘n funnu a l’imprisa,
Attenti a li cuàrpi di li virìati.

Campiuni n’appi la squatra paisana:
Lu primu - e siti d’accordu cu mìa,
Ca si miritava cchiossà furtuna -
Di certu iu piansu ca fu Zaccaria.