Sapiti socchi mancia la biddina?
Difficili putirl’adduminari
idda nun moli carni bianc’e fina.
Rrobba dura cci piac’arruzzicari.

Parissi ca si coddra sani sani
li poviri e mischini mititura
c’abbruscianu a lu suli pi lu pani
e li sepolti vivi pirriatura.

Chissi hannu carni belli asciutti!
senza lu grassu c’havi lu maiali.
Su carni sapuriti e belli cuatti
ca canuscinu surfaru e sali,

ddu sali ca c’arresta ni la peddi
quann’a iddi s’asciuca lu suduri
e l’uamini addiventanu canneddi
pi fari grassu lu propriu signuri.

Biddina ‘un men’a diri ch’è pulita
comu parissi di lu nomu a tia,
ca mmucca è dunci e frisca, na granita!
viastia ven’a diri, ascunta a mia!

Nun sacciu s’idda esisti veramenti
forsi sunnu tutti cos’ ammintati
di genti ca la bestia un ci fa nenti
e tiannu li gnuranti ‘ncatinati,

arrubbannuci saluti e dignità
tiniannuli arrassu d’unni vuannu
e trattannuli cchiu’ peggiu di giufà.
Tantu la curp’ è di lu mostru trannu.