Arrivaru li Mùarti e sulu carbuni
ashiavu arriscidìannu ddu casciuni,
ca quann'era la sirata di li Santi
ristava mìazzu apìartu e assa' vacanti,

pi mìagliu 'ndirizzari l'armi cari
ca di notti arrivavanu senza shiatari,
acchianannu li scali lìaggi e cuntenti
pi nun scantari li carusi attenti

ad ogni rumurìaddu di lucchettu
cunvinti ca lu mùartu avissi aspettu,
purtassi sciarpa e 'na birritta 'n'testa
comu si fussi arrizzittatu a festa.

E nun cridìannu cchiù a ssì minchiati
mancu lischi mi portanu, o patati:
si singaliaru l'indirizzu miu
e dall'ariu talìanu comu un pipìu.

E comu a chiddi tìampi peni e affanni
attristavanu tutti, nichi e granni,
accussì staiu a la finestra attentu
aspittannu ddu miraculu d'eventu!

Passà 'ma nannu e mi talià currivu
pinsannu c'aspittassi un pupu o un piru;
parlà, e mancu mi parìa ca fussi mùartu:
"S'arresta quarchi cosa a tìa la pùartu".

La notti mi passà taliannu all'ariu
tutti ddi stiddi ca parìa un rusariu;
pùa finarmenti arriva 'ncapu 'na scupa
assà spiaciutu e cu la facci cupa:

"Nenti arristà pi tìa, niputi caru,
l'annu ca veni a tìa pùartu un rigalu.
Sempri ca canci idea e cridi ancora
comu 'na vota, e non comu fa ora!".

                                         Federico