A GIANPIETRU

Davanti a ddù tabutìaddu nìcu nìcu,
oji mi sìantu quasi accuttufàtu,
tanti anni passàru ca nascìsti,
e mancu a li tò amici ti mustràsti.

T'avìssi vulùtu crisciutìaddu e bìaddu,
cu li tò anni ormai, quasi 'n surdàtu,
ma n'cìalu stava scrittu ca u tò fatu
accussì vulìa ed accussì è annàtu.

T'avìssi vistu nasciùtu la tò mamma,
tanta cuntintìzza avìssi avutu,
invèci mancu chissu potti avìri,
ma lu stessu ti voli beni e amuri.

Chi diri pùa di tutti i tò parìanti,
di li tò amici e puru li tò nanni,
ca sunnu ormai 'ncìalu 'nsìami a tìa,
e di sicùru ti tìannu cumpagnìa.