Deci anni ormai passaru, e pari ieri, c'all'aria arrivularu ddi dui cristi; murìaru cu la scorta e la muglieri pi manu di mafiusi laidi e tristi  ca ormai si sintivanu lu jatu darreri di lu còddu e ni l'oricchi: allura pi scappari a un tristu fatu pi aranci li tagliaru a cìantu spicchi.  'Na bumma di tritolu priputenti canciava di Falcuni lu distinu; dui misi e n'autra bumma cchiù fitenti purtava morti atroci a Borsellinu.  Pariva ca 'u teatru di Palermu 'na farsa cu li pupi ricitava; o Santa Rosalia granni in eternu ddi botti lu fistinu arrricurdava.  Inveci ddi dui bummi tinti e amari la mafia l'addumava pi davveru, pi diri ca in Sicilia a cumannari su sulu li mafiusi: ed era veru! E mancu pinna o foglia si muvìa si unn’era don Totò ca l’urdinava, e ‘n’arma lesta in cìalu si nni ìa si appena lu jitìddu cutuliava.

PAOLO         E  GIOVANNI

Ma doppu ‘sti delitti a ddi furfanti la terra ballarina addivintà, ca tutta la Sicilia, grida e chianti, vinnitta granni assai addumannà. Li capi finarmenti cunnannati ‘ngalera dritti dritti sinni ìaru, ma doppu deci anni, accuttufati, la testa lenta lenta già righìaru. E comu cala e sprisci un virdi juncu quannu la china tuttu lu cummoglia pi pùa turnari all'ariu ni ddu puntu cu forza di campari e tanta voglia; ora accussì la mafia torna e dici ca forsi avìa babbiàtu pi deciànni: si prima a cumannari era felici ritorna a cumannari a tutti banni. E intantu ch’idda abballa e spara fisci ni canta 'n'sicilianu a li finestri: "Ammàtula ti pettini e t'allisci ssu pinzeri chi hai ‘un t'arrinesci". Ma pinzannu a Giuvanni e Paulinu ca sunnu eroi di la nostra terra, caduti pi sarbari lu distinu di tutti i siciliani sempri in guerra, facìammu ca ‘sta mafia ruvinusa anchìannusi li trusci e li visazzi sparissi intra li tani e li pirtusa lassannu a li cristiani vìi e chiazzi.