|
XXX – Pinocchiu, inveci di divintari carusu, parti a l'ammucciuni cu lu so' amicu Lucignulu pi lu paisi di li Balocchi.
Comu è naturali, Pinocchiu dumannò subbitu a la Fata lu permissu di jìri in giru pi la città a fari l’inviti: e la Fata cci dissi: - Va’ a invitari li to’ cumpagni pi la culazioni di dumani: ma ricordati di turnari a la casa primu ca si fa notti. Capisti? - Fra ‘n’ura prumittu d’essiri bellu e riturnatu, - dissi lu pupu. - Attentu, Pinocchiu! Li carusi la fannu lesta a prumittiri: ma lu cchiù di li voti, fannu tardu a mantèniri. - Ma ju nun sugnu comu l’àutri: ju, quannu dicu ‘na cosa, la mantìagnu. - Stammu a vidiri. Si pùa disubbidisci, tantu peggiu pi tìa. - Pirchì? - Pirchì a li carusi ca nun ascuntanu cu ni sapi cchiù d’iddi, spessu cci capita quarchi disgrazia. - E ju lu pruvavu! – dissi Pinocchiu. – Ma ora nun cci cadu cchiù! - Vidìammu si dici la verità. Senza diri àutri paroli, lu pupu salutò la so’ bona Fata, ca era pi iddu ‘na speci di mamma, e cantannu e ballannu niscì fori di la porta di casa. Doppu ‘n’ura, tutti li so’ amici fùaru invitati. Quarcunu accittò subbitu e di gran cori: àutri all’iniziu si ficiru prigari tanticchia; ma quannu sìappiru ca li panini di vagnari ni lu cafè e latti avivanu a essiri sparmati di burru anchi ni la parti di fori, finìaru cu lu diri: "Vinìammu puru nuàutri, pi fariti piaciri". Ora bisogna sapiri ca Pinocchiu, fra li so’ amici e cumpagni di scola, n’aviva uno pridilettu e carissimu, ca si chiamava Romeu: ma tutti lu chiamavanu cu lu soprannomu di Lucignulu, pirchì aviva un fisicu asciuttu, siccu a allampanatu, tali e quali comu lu mìaccu nùavu di lu luminu di notti. Lucignolu era lu carusu cchiù svugliatu e birbanti di tutta la scola: ma Pinocchiu cci vuliva un granni beni. Infatti jì subbitu a circarlu a casa, pi invitarlu a la culazioni, e nun lu truvò: turnò ‘na secunna vota, e Lucignolu nun c’era: turnò ‘na terza vota, e fici la strata ‘mmàtula. Unni putìrlu jiri a piscari? Cerca di ccà, cerca di ddà, finarmenti lu vitti ammucciatu sutta l’àstracu di ‘na casa di viddani. - Chi cci fa’ ccà? – cci dumannò Pinocchiu, avvicinannusi. - Aspìattu la mezzanotti, pi pàrtiri… - Unni va’? - Luntanu, luntanu, luntanu! - E ju ca haiu vinutu a circariti a la casa tri voti!… - Chi vulìvatu di mìa? - Nun sa’ lu granni avvenimentu? Nun sa’ la furtuna ca mi capitò? - Quali? - Dumani finisciu d’essiri pupu e divìantu carusu comu a tìa, e comu tutti l’àutri. - Beni pi tìa. - Dumani, allura, t’aspìattu a culazioni intra ni mìa. - Ma si ti dicu ca partu ‘stasira. - A chi ura? - A ‘n’àutra tanticchia. - E unni va’? - Vaiu ad abbitari intra un paisi… ca è lu paisi cchiù bìaddu di ‘stu munnu: ‘na vera cuccagna!… - E comu si chiama? - Si chiama lu Paisi di li Balocchi. Pirchì nun vìani puru tu? - Ju? No pi davveru! - Ha’ tùartu, Pinocchiu! Cridi a mìa ca, si nun vìani, ti nni pìanti. Unni vo’ truvari un paisi cchiù salutari pi nuàutri carusi? Ddà nun ci sunnu scoli: ddà nun ci sunnu maistri: ddà nun ci sunnu libbra. Ni ddu paisi binidittu nun si studia mai. Lu giovidì nun si fa scola e ogni simana è fatta di sei jovedì e di ‘na duminica. Figurati ca li vacanzi di l’autunnu accumincianu cu lu primu di jinnaru e finiscinu cu l’urtimu di dicìammiru. Eccu un paisi, comu piaci veramenti a mìa! Eccu comu avissiru a essiri tutti li paisa civili!… - Ma comu si passanu li jurnati ni lu Paisi di li Balocchi? - Si passanu jucannu e divirtìannusi di la matina a la sira. La sira pùa si va a lìattu, e la matina doppu si ricumincia arrìari. Chi ti ni pari? - Uhm!… fici Pinocchiu: e mossi tanticchia la testa, comu pi diri: "E’ ‘na vita ca facissi vulintieri puru ju". - Allura, vo’ partiri cu mìa? Sì o no? Deciditi. - No, no, no e pùa no. Ormai prummisi a la ma’ bona Fata d’addivintari un carusu pi beni, e vùagliu mantèniri la prumissa. Anzi, siccomu vidu ca lu suli scinni, ora ti lassu subbitu e scappu. Allura addiu e bon viaggiu. -Unni curri cu tanta furia? - A la casa. La ma’ bona Fata voli c’arritùarnu primu di notti. - Aspetta ‘n’àutri du’ minuti. - Fazzu troppu tardu. - Du’ minuti suli. - E si pùa la Fata mi rimprovera? - Lassala gridari. Quannu finisci di gridari pi beni, si carma, - dissi ddu birbanti di Lucignolu. - E comu fa’? Parti sulu o in cumpagnia? - Sulu? Sìammu cchiù di cìantu carusi. - E lu viaggiu lu faciti a la ppedi? - A mezzanotti passa di ccà lu carru ca ni piglia e ni porta finu dintra li cunfini di ddu furtunatissimu paisi. - Chi pagassi si ora fussi mezzanotti!… - Pirchì? - Pi vìdirivi pàrtiri tutti ‘nsìami. - Resta ccà ‘n’àutra tanticchia e ni vidi. - No, no: vùagliu turnari a la casa. - Aspetta ‘n’àutri du’ minuti. - Haiu pìarsu troppu tìampu. La Fata pùa resta in pinsìaru pi mìa. - Povera Fata! Forsi si scanta ca ti mancianu li taddariti? - Ma allura, - dissi Pinocchiu, - tu si veramenti sicuru ca ni ddu paisi nun ci sunnu scoli pi nenti?… - Mancu l’ùmmira. - E mancu maistri?.. - Mancu unu. - E nun c’è l’obbligu di studiari? - Mai, mai, mai! - Chi bìaddu paisi! – dissi Pinochiu sintìannusi sudari la gula. – Chi biaddu paisi! Ju nun ci haiu mai statu, ma mi lu 'mmàgginu!.. - Pirchì nun vìani puru tu? - E’ ‘nnutuli ca tu mi tìanti! Ormai prummisi a la ma’ bona Fata di divintari un carusu di giudiziu, e nun vùagliu mancari a la parola. - Allura addiu, e salutami tantu li sculi ginnasiali!.. E anchi chiddi liciali, si l’incùantri pi la strata. - Addiu Lucignolu: fa’ bon viaggiu, divìartiti e ricordati quarchi vota di l’amici. Dittu chissu, lu pupu fici du’ passi comu pi jirisìnni: ma pùa, firmannusi e girannusi versu l’amicu, cci dumannò: - Ma si’ propriu sicuru ca ni ddu paisi tutti li simani sunnu fatti di sei jovedì e d’una duminica? - Sicurissimu. - Ma si’ propriu sicuru ca li vacanzi accumincianu cu lu primu di jinnaru e finiscinu cu l’urtimu di dicìammiru? - Sicurissimu! - Chi biaddu paisi! – ripitì Pinocchiu, sputannu scunsulatu. Pùa, cu animu sicuru, dissi di cursa: - Allura, addiu veramenti: e bon viaggiu. - Addiu. - Fra quantu partiti? - Fra du’ uri! - Piccatu! Si a la partenza mancassi sulu ‘n’ura, quasi quasi putissi aspittari. - E la Fata? - Ormai fici tardu!… E turnari a la casa ‘n’ura prima o ‘n’ura doppu, è lu stessu. - Poviru Pinocchiu! E si la Fata ti rimprovera? - Pacìanzia! La lassu gridari. Quannu finisci di gridari ben beni, si carma. Intantu s’avìa fattu già notti e notti scura: quannu a un trattu vittiru mòvirisi in luntananza un lumicinu… e ‘ntìsiru un sùanu di cianciani e ‘nu squillu di trummetta, accussì debbuli e suffucatu, ca pariva lu sibbilu di ‘na zanzara! - Ecculu! – gridò Lucignolu, scattannu all’addritta. - Cu è? – dumannò suttavuci Pinocchiu. - E’ lu carru ca veni a pigliàrimi. Allura, vo’ viniri, sì o no? - Ma è propriu veru, - dumannò lu pupu, - ca ni ddu paisi li carusi nun sunnu ubbligati a studiari? - Mai, mai, mai! - Chi biaddu paisi!.. chi biaddu paisi!… chi biaddu paisi! |
