Lu vulcanu


Comu scuppietta e vuddi, stù vulcanu,
ca paci unn'havi mai, mancu du' uri,
quannu cci passa 'ncapu 'n'aeruplanu
iddu saluta sempri comu un signuri.

Quannu talìa all'ariu lu viddànu,
vidi un pinnacchiu e pensa cu tirruri
a un tirrimotu ca pari luntanu
ma po' scasciari sempri a tutti l'uri.

Russa la lava va intra lu mari,
curri a vaddùni versu lu paìsi;
sulu la Santa la poti firmari

doppu prighièri e supplichi di misi.
Ma mìagliu ca cuntinua a ripusari,
scurdannusi li tanti ranni offisi.

Ca si cci gira e trema comu usa
dda terra si trasforma ballerina,
s'annacanu li casi e li dammusa,
si jàccanu li ìssa comu rina.

L'acqua d'u mari vùddi vavarusa,
tutti li spirdi ciùscianu a catina;
povira varca abballa dulurusa,
chiàncinu li parìanti a la marina.

Parlati a lu vulcanu cu amuri,
dicìticci ca sìammu brava genti
ca sti prumissi un su' di marinai;

Iddu v'ascùnta sempri cu firvuri:
ma attenti a un cugliuniàrilu pi nenti!
ca si ddiventa surdu, sunnu guai.