Lu cunvegnu di li passari            (Chi è il vero re? Lu Pipituni!)          Un certu jùarnu ca lu callu vinni du' pàssari s'ashiàru a la surgiva; cantannu si tiravanu li pinni pi vìviri dda gùccia ca cadiva. Dall'ariu 'na cucciùfa si ni scinni ca frisca e salutari la sapiva, e mentri 'na calànnira già svinni, un merlu s'abbicina all'acqua viva. Pariva 'n'assemblea di cantanti calati ni l'arena pi luttari, e diri cu la vuci a l'antri fanti: "Iu sugnu la rigina cchiù 'mpurtanti, lassatimi a la funti abbivirari, o chiamu li m'amici e sunnu tanti". U sbardu di pirnici ca passava pi ìri di la Cuba a 'u Ponti granni, vidìannu 'a cunfusioni ca rignava vicinu a la surgiva tra li canni, curiusu di sapìri s'acqua amara putiva suddisfari i propri affanni, scinnì cu 'n'eleganza bella e rara firmànnusi dintornu a chiddi banni. Na pispisìdda tantu nica e bedda ca 'u nidu avìa pusatu ni dda via, santava e pizzulìava la cardèdda, sapìannu ca ssà zuffa di vanedda di norma ogni tri jòrna succidìa d'agùstu, ca lu càllu 'a testa stedda. Tra tanta confusioni di mircatu arriva un cicirùni un po' curiusu, anchi un cruvacchiu si sistema a latu taliànnu dd'assemblea pinzirusu. Parìa ca tutti ancìaddi d'u criatu vulìanu cunquistari ddu pirtusu! Quannu arrivà lu re cu lu surdatu, 'ntesta 'na cruna e tuttu maistusu, un silenziu di tomba anchì 'u vaddùni, anchi lu cuccu smisi di cucchìari, e tutti canuscìaru lu patruni. Lu carcarazzu cu lu so' vuciùni si misi 'mmìazzu a tutti a pridicari: "Onuri a 'u nùastru re, lu pipituni".