La granita siciliana

 

Quannu lu suli all'ariu pinnulìa
ca pari di lu fùacu 'na furnaci,
e tuttu lu caluri ca famìa
di 'ncùaddu ti lu sìanti comu braci,

e unn'ashi rifrigeriu pi la via,
e mancu si ti ìatti 'nterra e giaci,
c'è sulu stu rimediu, sìanti a mìa,
ca sugnu sicilianu assà veraci:

t'assìatti a un tavulinu d'u balcuni
e pigli 'na granita siciliana,
attentu ca sia fatta cu' limuni
di chiddu ca cc'arriva di la chiana;

si pùa è di Luvigia o Luvigiuni
lu callu si nni stà a la luntana.