LU SCECCU

C’era ‘u sciccuzzu ca girava ‘ntunnu
tirannu ‘na corda cu ‘na gran fatica,
l’ùacchi attuppati nun vidìa lu munnu
si c’era scuru o si la luci amica.

Tirava l’acqua ddu mischinu urbatu
mittìannu in muvimentu tanti roti
ca facìanu girari un granni catu
c’acchianava e scinnìa pi tanti voti.

E l’acqua ca niscìa di ddu gran puzzu
anchìa ‘na gebbia ca parìa un lacu;
l’avissi vista armenu dd’armaruzzu
di cori avissi tratu un granni jatu.

L’acqua scinniva dintra un tubu tantu
versu un jardinu di limuna e aranci,
chinu di ciuri di culuri biancu
ca si cci pìansi t’accuttufi e chianci!

E tanti lapi ca guziannu ‘ntunnu
sucavanu d’a zagara li ciuri,
mittìanu ‘u puncigliuni accussì ‘nfunnu
pi fari un meli ca parìa ‘n’amuri.

Senza ddu sceccu ca suffrìa la tussi
e pìdita e ragli ni facìa a muliuna,
nenti jardinu e nenti aranci russi:
sulu ruvetta e macchi di carduna!