Mi ricuardu quasi fuss’aiari
Di quannu vinìa unu di frustiari
C’una topolinu a giardinetta
Facìannu poesii a la canzetta.

P’ognuno c’era lu so’ pidalinu:
s’avìa circari intra un gran cufinu.
Ma lu curiusu di lu so’ mircatu
Era la litanìa c’avi’ammintatu.

Vinìa di la provincia di Girgenti,
E si mintiva a chiamari genti,
Accuminciava ‘n dialettu sicilianu
Finiva pua parlannu lu talianu.

Secunnu mia vannìav’a doppiu sìansu.
E vi lu spiagu ì, picchì lu pìansu.

Gridava iddru:
"O fimmineddri, a ccu s’ava ‘ncanzittari,
ca cca c’è lu ‘ncanzittaturi"
- cuntinuannu pua cu lu talianu-
"Abbiamo calze per donna, calze per uomo, calze per bambini."
"Abbiamo calze in filanca, con cento fili di nailon ribattuti in acciaio".
- e finiva comu avìa accuminciatu- :
"O fimmineddri, a ccu s’ava ‘ncanzittari,
ca cca c’è lu ‘ncanzittaturi".

Chi ssu ssi cìantu filura d’azzaru???
A chiddri tiampi nun mi lu spiegaru.
E mancu mi spiegaru ddr’allusioni.
Si dissi c’avia un specchiu in dotazioni

E l’appuiava ‘n terra ddra vicinu
Unn’era assistimatu lu cufinu:
quannu la fimmineddra c’ancugnava
ni lu specchiu lu sutta ci taliava!

Picchì nun minni cchiù pua ddru mircanti?
Forsi lu stancà fari l’ambulanti?
Dissiru ca lu cummincì na rama
ch’era miagliu canciari panorama!