LA PRIMA VOTA        (Prima o doppu càpita la prima vota....!)   Li quattru amici, ddà sira, chini d'arduri, dicìanu ch'era l'ura di pruvari, e si truvaru ni li quartìari noti, di tanti bbuttani pupulati, ca parìanu d'u cìalu scutulati.  Firriànnu pi ddi vìi chini di genti, pupulati di vizzi un sacciu quanti, vidìatu unu cuntrattàri i sordi, nàutru a fiancu tuttu russu e cùntenti, mentri un terzu parìa fori di menti.  Passànnu e taliànnu e ritaliànnu, a i quattru amici ca si sintìanu aitanti, lucìanu l'ùacchi e si cunfunnìa la menti, pi tutta dd'abbunnanza sì mai vista, ca mancu 'ncìalu cridìanu fussi la stessa.  Vidìanu cosci a tutti i lati esposti, minni di vacca e minni piccirìddi, certi panzuna d'un putìri diri, un gran culùni da fari u cuncurrènti, a un rutuni di paglia rutulanti.  "Minchia, cumpà, chi minni e culu tunnu!", dissi lu primu versu lu secùnnu. "Certu taglia un esisti pi ssì mutànni!", cummintà l'autru ca parìa cchiù granni. Mentri lu terzu parìa chinu d'affanni.  S'arristàru davanti a 'na casùzza, ca illuminata d'u suli parìa tutta; ' nu granni lìattu 'ncentru di la stanza, cu 'na buttana granni tanta, tanta, jittàta supra 'na cuperta stìnta.  Làdia era, grassa, curta e tunna, ca a vìdirla beni parìa comu 'na bumma! Si rutulava 'ntra un lìattu trimulanti, spustannusi ora a destra ora a manca, quasi 'na varca in mari supra l'onda.  La vuccàzza rapìa comu un gran furnu, la linguàzza muvìa a destra e a manca, un cartellu avvisava i sò clienti: "Taliàri nun vi costa propriu nènti: ma si tuccàti, sùnnu sordi sunanti!".  Li quattru nuviddùna si taliàru, cu l'ùacchi a pampinèdda si capìaru: chìsta era l'ura e l'occasioni bona, pi rumpiri u dijiùnu e pi sapìri, ìri a buttani sòcchi vulìa diri.  Lu primu si lancià viloci e lestu, 'na minna accarizzà tuttu trimanti, girà 'ntùnnu a lu littàzzu granni, lassànnu i sordi 'ntra un piattu biancu, ca la patruna avìa posatu a fiancu.  Lu secùnnu cu cchiù curaggiu 'ncùarpu, s'avvicinà a ddù lìattu scunfinatu: cu 'na carizza a ddù culazzu tunnu, comu lu primu si nni ìu cuntentu, mentri a buttana taliàva cu sgumentu.  Quannu lu turnu fu d'u terzu amicu, a pisci si lancià 'ncapu a ddù lìattu, e immantinenti niscì li sò pinnenti: mancu avìssi statu un motopìcu, o 'nu lampu ca scascia di punènti.  Lu quartu ca a la porta si nni stava, e a tràsiri ddraìntra quasi pinsava, a la vista di ssà scena sì opprimenti, dissi tintinnanti e affrantu: "Ddùacu, un ci trasu, mancu pì nnenti!".