'A livella
"Si po' sapiri chi vùa, lassami 'n paci.
Ora si' mùartu, chiui l'ùacchi e taci".
"Ti nn'agghiri di ccà, nun ti suppùartu:
ératu ladiu vivu, pensa di mùartu".
"Ma chi fa? Cugliunìi? Passà la santa,
e nun po' cumannari a destra e a manca!
Intra un pirtusu si', assìami a mia,
stinnilicchiatu e senza cchiù putìa.
Ammatula t'addumi e piardi ciatu:
lu becchinu cumanna tuttu 'stu pratu.
E si di stàriti vicinu fu la sintenza,
ti tocca suppurtari 'a ma prisenza".
"Chi ti scurdasti ca sugnu lu zi' Tanu
e ca tutti mi facìanu 'u vasamanu?
Tu si' un viddanu ca nun po' capiri
lu cumannari socchi voli diri".
|
"Lu sacciu, lu sacciu, fusti mafiusu,
ch'ératu tintu e tantu fanfarusu.
Ca cumannàvatu un gruppu di briganti
c'ammazzavanu genti bbùani e santi.
Si ti sputavu tannu, ch'era 'na festa,
ora ti sputu ancora, ti sputu 'ntesta!".
"Ti 'n'apprufitti ca si 'n'capu a mìa
ca si fùssitu sutta, guai pi ttìa!
Ti facissi vinìri 'a cacaredda
comu quannu scappasti senza vardedda".
"Fusti mafiusu e puri un gran vigliaccu
ca cci vulìa 'na corda fatta ad'agghiaccu.
Eratu forti cu pistoli e bummi,
ora si' nenti, e di fituri abbunni.
Ti sputu ancora, intra l'ùacchiu destru
e nill'ùacchiu sinistru sputu cchiù lestu,
pi quannu m'arrubbasti mula e li stigli
ch'era lu pani di mugliera e figli".
|
"Ma comu ti pirmìatti, o gran fitenti,
di sputari nill'ùacchi a un cumannanti?
Anchi si sugnu sutta e c'è la grata
lu stessu ti la dugnu 'sta pidata".
"Vistu ca parli assà, mala cunnutta,
pigliati 'sta sputata, intra la vucca.
Spirannu ca la chiui tutta pi sempri
e pìansi a li piccati fatti a li genti.
Ccà, sìammu tutti misi a livella
nun c'è patruni e mancu c'è bidella.
Sulu pinsari n'è cuncessu ormai;
li cosi bbùani o li piccati e guai.
Vihiu ca 'un parli cchiù e ancora agliutti:
finarmenti c'è paci, paci pi tutti!".
Federico
|