LA JUMENTA     Currìa dda jumenta ormai libbrata di la cuddana ca sempri l'opprimìa, currìa sì forti ca parìa 'na badda, mancu lu forti vìantu la juncìa. Lu sò viddanu apprìassu la chiamava friscannu e vastimiannu pi la via: ma chidda cuntinuava a scalpitari senza cuddana e spruna a cui pinsari. Libera ormai di tuttu si sintìa, lu sò patruni luntanu ormai era, quasi 'ncìalu arrivava ‘a sò criniera, libera di irisìnni unni vulìa. E currìannu lanciava un nitritu comu quasi circassi un maritu: e l'avissi truvatu in nuttata si la sorti l'avissi aiutata. Ma mentri currìa pi ‘a vanedda, un pirtusu piglià, puviredda, e sbattìannu contru u’ scaluni, sciddicà, e fu un gran ruzzuluni. Lu patruni ca arrivava sudatu la talià e cci dissi: "Piccatu! Avìatu statu 'na bedda cavadda, ora ormai un ti resta ca 'a stadda". La jumenta talià lu patruni, e jittànnu 'nu forti jatuni allargà li sò occhiuna, pi diri: "Mìagliu essiri mùarti, ca vivi".