L’ACCHIANATA
Lu tìampu addivintà nìuru forti
quasi sintìa già ciàuru di morti;
doppu un lampu scasciava ‘na truniata
e tutta 'a genti pia era scantata.
Lu sò tirruri unn’era pi la sorti
d’u Cristu c’acchianava versu la morti:
pinsava ca ddu lampu sì accicanti
putissi scuppulari ‘n’testa all’istanti.
Lu Cristu accumincià la sò acchianata
la cruci ni li spàddi appiccicata,
‘na vesta russa tutta lùdia e rutta
pi li nirbati ca ‘a pirciava tutta.
Na cruna avìa ‘na testa forti chiantata
ca sangu ni ìttava ‘na catata,
e tuttu finu a li pìadi lu tincìva
comu agnìaddu scannatu iddu parìva.
A latu cu la lancia c’era un surdatu
cull’elmu ‘ntesta e di pugnali armatu,
parìa ‘n’atturi di teatru stranu:
Filìdda era ‘u sò nnòmu paisanu.
Darrìari, la Madonna addulurata
taliava lu sò figliu accuttufata,
cu ‘na viletta nìura misa na’ testa
chiancìva e tintinniava tristi e mesta.
E passannu davanti a lu firraru
vitti ca travagliava comu ‘n’armaru;
un fìarru russu martiddiàva a ddùra
pi fàrini ‘n’attrezzu di tortura.
"O caru mastru, chi facìti a st’ura?"
cci dumannà Maria cu gran premura.
"Fazzu ‘na lancia e tri pungenti chiova"
cci arrispunnì lu mastru d’intra l’arcova.
"Nun lu facìti a st’ura", dissi Maria,
du’ vòti vi la pagu la mastrìa!".
"O cara donna, nun lu pùazzu fari,
a pùastu sò mi pùannu ‘nchiuvari!".
Un coru si livà, parìanu cìantu,
di Cristu apprisintava lu turmìantu,
chiamava la sò matri sutta la cruci:
di Vicìanzu di Lìddu era la vuci.
A chistu, nantru coru arrispunniva,
chiamava lu sò figliu ca murìva,
era la matri ca nun capìa ragiuni:
tra l’antri vùci chidda di Barùni.
Darrìari in prucissioni tanti fratelli
cu ‘mmani li lanterni e li mantelli,
vistuti cu’ li sai e ‘ncappucciati
parìanu li guerrieri o li cruciati.
Apprìassu apprisintatu ogni mistìari
cu tutti li firràra e lu vuccìari,
e tanti surfarara chini di peni
purtavanu ‘u picùni e i citalèni.
Don Vitu tuttu viòla e li parrina
cantavanu li salmi a vùci china,
e ‘u coru di la genti ca rimava
lu cìalu illuminava cu fanàra.
Ogni tantu ‘na trumma sulitaria
facìa trimari ‘a terra e puri l’aria,
tant’era assà finnùta e commuventi
ca ‘u cori di tristizza anchìa d’a genti.
Taliannu di la chiesa ch’era cchiù anta
vidìatu ‘a prucissioni longa e santa,
e si di lu dumila era lu tìampu
parìa turnati a zeru comu d’incantu.
Lu scuru avìa calatu di la sira
e lenta ‘a prucissioni antu ìva;
lu Cristu già tri vòti avìa cadutu
la mani di somà l’avìa susùtu.
E doppu tanti peni e affannu làdiu
arrivà ‘ncapu lu cùazzu d’u Carbàniu,
unni lu sò distinu ormai scuntatu
sarbava tuttu lu munnu disgraziatu.
Du’ chiova pi li mani lu passaru,
du’ chiova li sò piadi spirtusaru,
‘na scritta cci ‘nchiuvaru ni la cruci
diciannu ca ddu Cristu era gran duci.
E doppu ca lu lignu fu ‘ddrizzatu
‘na lancia trapassà lu sò custatu,
pi diri a tutta la genti ca taliava
ca veru era lu mùartu e nun babbiàva.
E mentri trona e lampi a nun finiri
anchìva 'u munti Ottaviu e i Petri vivi,
un coru di lamìanti assà struggenti
nunziava ca lu Cristu era murenti.
La trùmma sunà ancora l’ùrtima vota,
la genti lu talià tutta divota.
E vistu ch’era già ura di manciari
turnà a li propri casi e a li sò affari.
