Na matina di tanti anni fa
T’arrivigliavatu e vidivatu a Sciaveriu e Baccalà
ca cu ddu scupi e na paletta
annittavanu luridii e l’ammunziddravanu n’ncapu na carretta.

Li fimmeneddri ci anzavanu arrunchiati
l’arriconta d’intra, purcarii e scorci arristati
ma nun facianu n’timpu a vuntari vaneddra
ca ad allurdari ci pinsava un cani, o na gaddrineddra
passava poi cu li crapi Peppi di la Carmileddra
e cu lu latti friscu t’anchiva un cicaruni o na taganeddra
si lamentavano a la n’sutta la Calummeddra e Anniddra Lanza
ma pacinziavanu pi l’amuri di s’inchiri la panza.

Anchi li muli stampavanu purpetta ‘mportanti
ca ristavanu pi n’arrancata belli fumanti
e quannu arrifriddavanu parivanu opiri d’arti puri
sia ch’eranu di culu di Sferrazza, Basaranu o di Genturi.

A li cantuneri , oppuri appuiati a na canalata
li carusi (comu li cani) quannu ci scappava ci lassavanu na pisciata,
ma sempri pisciata di n’nuccenti, n’ tiniri, ch’era quasi profumata
a confrontu di la pisciazza di li vecchi di notti arraddamata .

Lu zi Pi e tri Anciuli ( Piccillu, Gaddrineddra e Genturi)
addrumavanu poi la pipa e lu sicarru quasi a tutt’ uri
e lu fumu cu chiddru di brasceri e tancina si ‘mrugliava
e Turiddra,Rosa, Marasanta e Filomè ca cu la paglia di fava
addrumavanu lu cufilaru cu li steddri
comu succidiva un pò in tutti li vaneddri.

All’avi Maria ddri sciauri addivintavanu divini
ma oramai li naschi ni eranu già chini,
e nun arriniscivanu mancu ad apprezzari lu valuri
di li pidita di lu zi Calù e Franci’ ca si facianu anuri
cu lu culu, comu si fussi capudannu,
e cu la scusa ca si nu li ietti ti ponnu fari dannu.

Ora sulu fietu di bitumi, di gasoliu e di benzina
mpricignanu l’aria di li moderni vaneddri
ma la nasca nostra nun abituata ad aria fina
ni pati cu cancri all’ossa, a la carni e a la peddri.