Unni na vota c’era un munnizzaru
E na trazzera tra stratuni e chiazza,
Rosa e Carmela na’ lenza a l’eredi ci lassaru,
Cu la spranza di farla godiri a la razza
Apprìassu la lenza divisa vinni in uarti
Spartuti di limmita e recinti,
Unni latini, unni sbilenchi e tuarti
E pi trasirci tri porti di ligna tinti
L’uartu d’Arcanciula la chiesa taliàva,
Chiddru di Vitu na via sacrificata,
Chiddru di Piatru di stratuni vidiva cu passava
Genti a cavaddru o a l’appedi ‘mpacinnata
Passava Tanu , malandrinu e n’tisu ca tirava drittu,
E passava Liboriu, guardia campestri ca ci detti li spaddri
Lu primu, prima di sentiri lu bottu
E l’antru prima di sentiri li baddri
Di li viddrani la matina sintìa la tappiatina,
Di li surfarara li murmurazioni,
L’uni s’abbiulavanu fori già cu l’acquazzina,
L’antri a lu funnu di pirrera cu l’impricazioni
Vicinu era , e li carusi ci ivanu a rubbari,
Vicinu e li fimmini ci jivanu a stenniri ,
vicinu , e li lùardi ci jivanu a cacari,
vicinu ,e agli e ligami, ci jivanu ad appenniri
li strunìaddri du voti l’annu ci vulavanu
facìannu n’cìalu milli disigna,
li carcarazza , turturi e cardiddri lu nidu ci cunzavanu,
cu arfa, fratta, erba e ligna
ficu , ficudinii , pruna, fraccochi e granatu
du zucchi d’inzolia ,salvia e rosmarinu,
crisciva lu mìagliu di tuttu lu criatu
sutta prighieri e binidizioni di parrinu
zarchi , cavuli e sminuzzatura
favi, agli, basilicò e menta
adacquati cu acqua di la brivatura
e addriccati cu fumìari di jumenta
pi ogni stasciuni , jhuri, virdura e frutti
erbi miraculusi pi un bisùagnu impruvvisu,
ci n’eranu pi tuttu e pi tutti,
e pi tutti parìa sempri un paradisu.