LA CIVATA

La passaredda torna a la nidata
purtannu nni lu pizzu la civata:
L'ucchiuzzi so su calici d'amuri
unni cc'è tuttu lu maternu arduri.

Torna la passaredda apprimurata,
l'ala cci trema tantu è 'nnamurata!
Tuttu lu paraddisu ca la chiama
l'havi ammucciatu 'nmenzu di na rama.

Arriva, posa, la ramuzza trema,
li passareddi sannu lu sistema,
allonganu lu coddu, fannu cciu
e parinu 'nfudduti pi lu priu

    FOCU D'ESTATI

Sutta la vampa di lu suli ardenti
cripìa la terra, e tutta la natura
cu l'occhi stralunati pi l'arsura
pari ca cchiù nun vidi e cchiù min senti.

L'aria 'nfucata trimulia, si senti
'nsinu nni l'ossa l'anfa e la calura,
sulu quarchi cicala 'un si nni cura
e pari ca facissi strudimenti.

lu nni stu 'nfernu, vivu senza vita,
comu un dannatu tiru cu li denti
lu pisanti carrettu di la vita.

E 'nmenzu a tantu focu e a tanta luci,
moru e arrivisciu tutti li mumenti,
comu lu Nazzarenu misu 'ncruci.

          LA BEFANA

Dumani è la befana; è la gran festa
addisiata di li picciriddi
e ogn'unu già smania nni la so testa
pi cavadduzzi, strummuli, pupiddi,
sciabuli, treni e ci pari mill'anni
l'ura ca ponnu fari cosi granni!

E li me' figghi, animi nnuccenti,
oduri santu di la vita mia,
hannu fuddatu dintra di la menti
tuttu chiddu ca cc'è nni la putia,
e cu pinsera di centu culura
cci parinu mill'anni quannu scura.

Pirchì sannu, 'nnuccenza di li figghi,
sannu chi a menzanotti la befana
trasi cu li so centu maravigghi
di lu pirtusu di la pirsiana:
di ddu pirtusu ca lu nicareddu
lu vuleva allargati c'un cuteddu!

Quannu è dumani li me' picciriddi
mi ristirannu affritti e scunsulati,
nni dd'occhi di nnuccenti muti e friddi
quantu sònnura d'oru sdirrubati!

        LA CULLANA

Pi fari o bedda na cullana a tia,
digna di tia ca si la me furtuna
sfirrai pi 'ncelu, cu la fantasia,
e ghivi cchiù luntanu di la luna.
Dda fici un nastru cu la ciamma mia,
li megghiu stiddi cci 'nfilavi a cruna,
ddoppu pigghiai lu suli ca nascia
cci l'appinnivi e ti fici patruna.

          SPARTENZA

Vola lu trenu, vola e pari a mia
c'avissi l'ali e tagghirria li venti,
pirchì mi porta luntanu di tia,
di la me casa e di li mei parenti.

Vola ca vola, ed iu di la finestra
viju girari Parvuli luntanu
e ciancu ciancu lànnari e ghjnestra
'nfudduti sfilittari manu manu.

L'aria nni trema, li vigni, l'olivi
si scanzanu pigghiati di spavento!...
... puru li petri sunnu cosi vivi
 e fuinu cchiù pazzi di lu ventu.

L'oceddi nni li campi abbituati
a la paci, l'amuri e lu cunzolu,
lassanu li so' canti appassiunnti
e sbalurduti spincinu lu volu.

Quarchi viddanu spersu nni lu chianu
chi zappa o arata appassiunatamenti,
si jisa e nni saluta cu la manu
pi comu siddu fussimu parenti.

Lu trenu curri, curri a gran carrera,
s'ammucca e sbucca di na gallarla,
mentri lu fumu pari la crinera
d'un cavaddu ca scappa a la fuddia.

E curri, vola! e tutti li rumura
ch'iu sentu nni sta cursa dispirata,
sunnu un turmentu, sunnu na turtura!
E lassu lu me cori strata strata.

         TRISTIZZA

Stasira c'è lu celu annuvulatu,
pari ca fussi fattu di cartuni;
e la luna assimigghia a un lampiuni
d'un velu di tristizza cummigghiatu.

Acqua nun chiovi eppuru c'è vagnatu,
vagnati su li casi e lu straluni,
si vidi ca lu celu è siddiatu:
comu lu cori miu chianci ammucciuni.